N’ebya Beth Akatukunda

Mary Akol omu kiro ekyabusheesha eriizooba yaarangiirirwa nk’osingire akaruuru k’okugarukamu kutoorana ceeyamaani wa disiturikiti eya Bukedea. 

Orikukurira eby’okuteeza akaruuru ahabwa Bukedea, Joel Mugenyi Mugerwa niwe yaarangiirira Akol, obaire okwatsire ebendera ya NRM omu karuuru aka, ahari shaaha 12.04 z’ekiro. 

Orikukurira eby'okuteeza akaruuru ahabwa Bukedea, Joel Mugenyi arikukurusya Mary Akol. Ebishushani n'ebya Godfrey Ojore.

Akol aihireyo oburuuru 79,692, haakurataho Tychicus Ebukalin owa Independent n’obururu 4, 941 kandi Sam Oita Odeke owa FDC akwatsire ogwa kashatu n’oburuuru 2, 343. 

Akol n’omukazi wa kabiri kuba mukuru wa disiturikiti omu byafayo by’ekyanga ekya Teso bwanyima ya Christine Apolot owabaire ari mukuru w’entebe ya kataano ahabwa disiturikiti eya Kumi kandi obwahati n’omuny’ishengyero-kazi wa Kumi.
Abantu 100,294 nibo bayehandikiise kuteera akaruuru aka. 

Mary Akol osingire akaruuru ka Bukedea.

Bwanyima y’okutangiirirwa nk’omusinguzi, Akol ashabire bataahi be abu abaire ayetsimbireho nabo okumwegaitaho bakakorera hamwe ahabw’oburungi bw’abantu ba Bukedea. 

Akol ahakaniise eky’okugira ngu okusinga akaruuru aka kurugiirire aha kwiba akaruuru.

Entebe egyo ekasigaramu busha bwanyima y’okufa kwa Moses Olemukan owaitsirwe endwara y’ekokoro omu kwezi kwa 12, 2022.

#WestUpdates