Kooti ejurirwamu kuhurira omushango gw’oburuuru bwa EALA eriizooba.

N’ebya Michael Odeng

Kooti ejurirwamu eriizooba neteekateekwa kuhurira omushango gw’oburuuru ahi abany’ishengyero 4 barikuhakanisa omuringo ogu akaruuru k’okutoorana abajwekyerwa omu Paramenti ya East Africa eya EALA kateirwemu ahabiro 29/09/2022.

Abany’ishengyero aba barimu; Gilbert Agaba, Josephine Lolem, Salaama Adelaide Nakitende na Lauben Muhangi Bwengye. 

Aba nibagira ngu omuringo ogu akaruuru k’abany’ishengyero omu paramenti ya East Africa kukaba nikuhenda ekiragiro kya East African Community (EAC) treaty, ekiragiro ky’eby’oburuuru bwa EALA hamwe n’engyenderwaho ya Uganda.

Abany’ishengyero 4 bakatabaaza omushango omu kooti barikuhababira omutonganiirizi wa gavumenti, Siipika wa Paramenti ya Uganda Annet Anita Among, kalaani wa Paramenti Adolf Mwesige Kasaija, Rose Akol Okullu, Dennis Namara, James Kakooza na Stephen George Odongo. 

Abandi abarikuhababirwa omu mushango ogu ni; Paul Mwasa Musamali, Veronica Babirye Kadogo, Mary Mugenyi Mutamwebwa, Jacqueline Amongin na Gerald Siranda Blacks. 

Omuhwezi wa Ishabaramuzi, Richard Buteera n’abaramuzi abanda abarimu Irene Mulyagonja na Catherine Bamugemereire nibo barikuza kuhurira omushango ogu. Omutonganiirizi wa gavumentu naija kujwekyerwa George Karemera.

Bakitabaza bakesimba omu karuuru k’okutoorana abany’ishengyero ba EALA akateirwe 29/09/2022.

Beitu hoona, bakatabaaza omu kooti barikuhakanisa ebyarugire omu kuteera akaruuru ako obwo bagumize ngu hakabamu ebitaragyenzire kurungi omu kuteera akaruuru aka.

Kitabaaza omwe, Gilbert Agaba naagira ngu akaruuru tikarabiire k’amaziima n’oburinganiza arikugira ngu akaruuru aka kakiibwa.

Nabwo naagira ngu Siipika wa Paramenti, Among owabaire akuriire akaruuru akaba nagwera orubanju ngu ahabw’okuba akarondera akaruuru abamwe ababaire betsimbireho.

#WestUpdates