Empaka z’okuhajaana omu purogyekiti eya ‘Green Schools Initiative’ zihwaire

Empaka z’okuhajaana omu purogyekiti eya ‘Green Schools Initiative’ zihwaire

N’ebya Eli Akiiza

Eishomero erya Ntare risingire empaka z’okuhajaana ez’amashomero ahansi ya purogyekiti eya ‘Green Schools Initiative’ bwanyima y’okusinga Sacred Heart SS, Mushanga.

Sacred Heart SS, Mushanga ebaire eyakabiri obwo erikukuratirwa Immaculate Heart Girls ebaire eyakashatu omumpaka ezikoreirwe ahari Ntare nyomwabazyo.

Omweegi arikuhajaana omumpaka...By Ssengendo Abdukarim

Purogyekiti egi erikwija kuheza ameezi 15, egyendereire okushomesa ahampinduka y’obwire n’okurinda eby’obuhangwa bw’ensi kandi neshagikwa Vision Group n’ekitongore ekya FAO obwo erikushashurirwa embassy ya Sweden omu Uganda.

Miria Sidney Babanga, orikukurira purogyekiti ez’omutaano omu kampuni ya Vision Group naagira ngu bagizireho empaka nk’ezi omubyanga ebindi nka Busoga, Bukedea, Teso, Karamoja, North, West Nile, Central, Kampala n’emyanya egyetoreire.

Abeegi barikuhajaana omumpaka ezi..By Ssengendo Abdukarim

Amashomero ashatu aga nigaija kujwekyera Burengyerwa-izooba omumpaka ez’eihanga ezirikwija kubaho amashomero gaheza kuhumura.
 
Agandi amashomero agetabire omumpaka ezi harimu Ruyonza School, Bubangizi SS, Kigezi High School, Kashaka Girls SS, Bishop Kivengere Girls School, Kibubura Girls SS na St. Gonzaga SS.

#WestUpdates