Ekizibu kya Uganda ti mirimo, n’obutagira kigyendererwa – H.E Museveni

Purezidenti Yoweri Kaguta Museveni yaamanyisa ku ekizibu ekiri omu Uganda kitari mirimo kureka enteekateeka, enyetwaza n’okuburwa ekigyendererwa omubatuura abatarikuhurikiriza butumwa bw’ekibiina kya National Resistance Movement oburikugamba ahakuhangaho obugaiga.

Minisita w'abakozi Esther Anyakun n'omuhwezi wa mukuru w'eihanga H.E Jessica Alupo bari ahakujaguza ekiro ky'abakozi omururembo Fort Portal eriizooba 01.05.2024. PHOTO PPU

“Mutangambira ah’eibura ry’emirimo, mugambe ahakuburwa ekigyendererwa. Emirimo eriho,” nikwo yaagira. 
Purezidenti ebi yaabigamba eriizooba ahakujaguza ekiro ky’abakozi okwaba ahari Mukabura omuri Fort Portal 
Ekiro ky’ensi yoona nikukuzibwa buri 01.05 kusiima emirimo y’abakozi omunsi yoona hamwe n’okwinegyeza obusingye n’emigisha yaabo.

Bamwe omubazini b'eby'enzaarwa barikushemeza abantu ahamukoro gw'okujaguza ekiro ky'abakozi omururembo Fort Portal eriizooba ebiro 01.05.2024. PHOTO: PPU

 
Okujaguza kw’omwaka ogu kwaba kwemereire ahamutwe ogugyendereire kubaasisa abakozi okutunga oburingaaniza kureetera abakozi kukora n’amaani.
“Omugwa 1996, Uganda ekaba yaatereiremu kandi omu Manifesito yaitu, tukateerera abantu omuranga ahaky’okukora kuruga omubworo. Tukabahabura kukoresa enkora eya hiika 4. Omu hiika y’okubanza nohingamu omwani, eya kabiri ohingamu ebijuma, eya kashatu otamu ebinyatsi by’okugaburira amatungo agatungyeirwe ahaka, eya kana ohingamu ebyokurya. Eka-nyima oriisizayo enkoko nari empunu ahari abo abatarikuzizira kandi abo abari haihi n’ebisharara bariisizamu ebyenyanja,” nikwo Purezidenti.

Abebembezi b'amadiini gatari gamwe na gamwe baahika ahakujaguza ekiro ky'abakozi omururembo Fort Portal eriizooba ebiro 01.05.2024. PHOTO: PPU

Kuri noogira ngu abantu nibakoresa kurungi eitaka rya Uganda ery’okuhingamu kuhangaho obugaiga, abo abaana boona abarikuza kukorera abaharabu tibaakugiireyo. Emirimo eri aha,” Purezidenti nikwo yaagira 
Purezidenti Museveni yayongyera yaahayo eky’okureeberaho ky’omuhingi, Omw. Richard Nyakana owa Rwengaju, owaahuriire obutumwa bwe kandi obwa hati orikutaasya shiringi 180,000,000 buri mwaka kuruga omunte z’amate, enkoko, okuhinga hamwe n’okwongyera omutindo omubintu ebirikuruga omumirimo ye aha hiika 1 y’eitaka.

Amahe g'eihanga, UPDF, garikukora emikoro y'okujaguza ekiro ky'abakozi omururembo Fort Portal eriizooba ebiro 01.05.2024. PHOTO: PPU

Beitu hoona Purezidenti yaahabura, abeebembezi b’ebibiina by’abakozi ngu baaza kugamba ahaby’okusherura emirimo, babanze bateho embeera y’okutungiraho obugaiga.
“Emirimo neeruga omubagaiga; t’orikubaasa kutunga mirimo otaine bugaiga. N’ahabw’ekyo, mwaba nimugamba, mugume mutandikane n’enshonga y’okuhangaho obugaiga. Kutunga emirimo endiijo muhurikirize engyenderwaho za NRM ahi abantu omubyaro bashemereire kugaitwa omuntaasya ezirikureeta sente z’eihanga ez’obuhingi obw’ahaitaka rikye n’obw’ah’itaka erihango.” 
Purezidenti hoona nabwo yaarabura abahingi n’abariisa abaine eitaka rikye kwetantara okukora emirimo y’eitaka erihango, agumize ngu omurimo ogwo nigurugamu amagoba gwaba gukoreirwe ahamwanya muhango.
#WestUpdates