Ekishaayi ky’enyonyi ekya Kabalega kukwatsibwa gavumenti omukwa kashatu

N’ebya Samuel Balagadde

Ekishaayi ky’enyonyi ekya Kabalega International Airport nikiija kuheebwayo omubutongore ekitongore ky’eby’emirimo n’entambura omukwezi kwa kashatu omwaka ogu ogwa 2026.

Aba SBC, ekitongore ekyakwatsiibwe omurimo gw’okwombeka ekishaayi eki, nibagira ngu bariyo nibamariira emirimo y’okwombeka omunaara ogu barikureeberamu entambura y’enyonyi kandi eki bariho hati n’eki barikushwijumiramu embeera y’obwire na munonga omumwanya kandi eki ni kimwe ahabyetengo by’omugasho munonga kuruga omubitongore ebirikukurira enyonyi; ekya Uganda Civil Aviation Authority na International Civil Aviation Organisation.

Orikujwekyera ekitongore ky’eby’emirimo n’entambura omumurimo ogu,Inginiya Fred Kayima naagira ngu eki nikiija kuba nikikoresa amashanyarazi aga ‘2.5 mega watts’ garikuhwerwaho za ‘generator’ ezirikweyasya aga gaaheza kurugaho kureebeka ngu oekishaayi kyaguma kiine amashanyarazi obwire bwona

Obwa hati turiyo nitukwatanisa n’ekitongore ekirikukurira eby’enyonyi omu Uganda ekya Uganda Civil Aviation Authority obwo turikwetebeekanisiza kutunga ebihandiiko ebirikuhamya ekishaayi eki nk’oku International Civil Aviation Organisation erikuragiira,” Kayima nikwo agizire.

Ayongyeire yaagira ngu bakaba batungire n’eitaka ry’emihanda erikuhika ahakishaayi kandi emirimo y’okwombeka enguuto ezi nayo ehwaire

Beitu Minisita Katumba ahaire enteekateeka ye kugira ngu bakorese amashanyarazi g’eizooba kukoresa omukwasya amataara g’ahakishaayi.

Okwombeka ekishaayi kya Kabalega kukatandika omugwa 2018, beitu kukaija kwatungamu emirabanamu otairemu na COVID-19 eyacumbagiizemu emirimo egi

Ekishaayi eki kiri ahabuhango bw’eitaka burikwingana ‘square kilometres’ 5.1 kandi omwanya ogu baraabe nibareeberamu entambura y’enyonyi n’emirimo endiijo guri aha square metres zirikwingana 600 kandi nikibaasa kuzamu enyonyi 4 ez’emigugu n’enyonyi ezindi 10 eza buriijo.

Omurimo ogu gukaba kushemereire kutwara obwire bw’emyaka 4 beitu gwayongyezibwayo ahabw’enshonga ezindi.

#WestUpdates
#Aviation