Eirwariro erya Mbarara ryatunga obuheereza bw'okukyebera 'TB'

N'ebya Beth Akatukunda

Eirwariro erihango erya Mbarara eriizooba ryatunga emotoka y'okutwara omu myanya etari emwe kukyebera abantu endwara y'akakonko (Mobile TB Clinic) kuruga omu gavumenti n'ekigyendererwa ky'okutunguura obuheereza bw'eby'amagara omu kyanga eki.

Arikuhayo ekyoma eki ahabarikwebembera eirwariro eri, Hanifah Kawooya, minisita w'eihanga ow'eby'amagara orikujunaanizibwa emirimo yoona yaashaba abashaho okuta amaani ahakushomesa abantu okwerinda endwara.

Yaashaba bakuru b'eirwariro eri okutwara obuheereza obu omu byaro bakabaasa kukyebera abantu endwara y'akakonko n'ezindi ndwara.

Kawooya yaarabura abashaho okwerinda okwiha aha bantu esente z'okubakyebera endwara y'akakonko arikugira ngu obuheereza obu bwona n'obwa busha.

Omu bigambo bye, Dr. Henry Mwebesa, orikukurira obuheereza bw'eby'amagara omu minisiture y'eby'amagara, yaagira ngu endwara y'akakonko ekiri ekizibu ky'amaani omu Uganda nikwo kushaba ku habaho okukwatanisa omu kugirwanisa.

Aha mukoro ogu, Mukuru w'eirwariro erihango erya Mbarara, Dr. Celestine Barigye yasiima gavumenti ahabw'obushagiki obu oburikwija kubahwera kuhisya abantu obuheereza bwa haihi.

Aha mukoro nigwo gumwe, gavumenti yaheereza disiturikiti eya Rubanda aka Tiivi aka 'Mobile Digital X-ray clinic' nabwo kubaasa kutunguura obuheereza bw'eby'amagara.

#WestUpdates