Edgar Mujuni abaasa kusingura ekiconco eky'abairaguju bato abakugu ekya 2026
Edgar Mujuni n'omwe omuri abo abaakozire satellite y'okubanza eya Uganda erikumanywa nka PearlAfricaSat-1
Edgar Mujuni, inginiya womu tekinologiya ey'omumwanya, ou eiziina rye rihairweyo kusingura ekya 2026 Young African Professionals. PHOTO: COURTESY
N'ebya Andrew Tushabe
Edgar Mujuni inginiya omukugu omuby’omumyanya kandi omunya Uganda obwa hati oriyo natemba amadaara kuba omwe ahabarikwebembera eby’omumwanya omuri Africa, n’omwe ahabakugu 8 aboorekyereire kusingura ekiconco ekya 2026 Young African Professionals okwezi okurikwija.
Okugaba ebiconco nikwija kuba omururembo orwa Libreville omu ihanga erya Gabon aharuteerane orwa NewSpace Africa Conference.
Oruteerane oru nirwo rurikukirayo omuri Africa omubikwatiraine n’enkora, eby’obushuubuzi (business policy) okuhangaho ebintu ebisya ebikwatiraine n’eby’omumwanya, tekinologiya orurikurundaana abantu abaine obushorozi bw’okutaho encwamu, abarikwebembera emirimo egi, abarikutaamu sente omumirimo egi n’abandi kuruga omuri Africa hamwe n’omumahanga g’aheeru ya Africa.
Mujuni naija kumanywa n’okugambwaho ahabw’omurimo gw’omutaano ogu yaakozire omukwombeka ekijungirizi kya Uganda eky’okubanza ekirikumanywa nka PearlAfricaSat-1, ekyatongoziibweho omukwezi kwa 12 omugwa 2022 omunkora eya BIRDS-5 International Program.
Aine diiguri y’edaara ry’okubanza omuby’empurizigana (telecommunications engineering) kuruga ahari Kyambogo University omu Uganda, diiguri ya kabiri ey’eby’omumwanya (masters degree inspace systems engineering) kuruga omu itendero erya Japan eririkumanywa nka Kyushu Institute of Technology (KyuTech) kandi ahi ariyo naashomera diiguri ye eya kashatu (PhD) kuba inginiya w’eby’empurizigana by’omumwanya aha Wireless Systems Laboratory.
Ogu ayebarize ekitongore kya African Space Agency hamwe na Space in Africa ahabw’okuta ekitiinisa omumirimo ye. “Eki ti kitiinisa kyangye nyenka nk’omuntu kwonka. Nikireeta entunguuka eriho neekorwa omubya tekinologiya y’omumwanya omuri Africa yaagira kihango eki erikumanyisa.
Mujuni ayongyeire yaagira ngu Purezidenti wa Uganda agambire munonga ahabuzibu obu Uganda eriho ahabw’obuteejumbira munonga omubya tekinologiya y’omumwanya agumize ngu eki tikirikubaasika kugumizamu omubwire obu ebya tekinologiya biriyo nibitunguuka omuri Africa.
#WestUpdates