Babiri bakwateirwe okwita omukazi omuri Kashari, Mbarara.
Byamukama ku abuuziibwe akasyo n’akahindu aha Pooriisi agambire amazima ngu Kembabazi Winnie (muramukazi w’omugyenzi) niwe amuhaire esente kwita Akankunda Ritah.
Omugyenzi amanyirwe nka Akankunda Rita, 25, omutuura wa Bwizibwera. Courtesy Photo.
By NewVision Reporter
Journalists @NewVision
N’ebya Omushaki weitu
MBARARA
Pooriisi omuri Mbarara ekwatsire abantu babiri ahabw’okugambwa kuba baitsire omukazi, 25 omuri Bwizibwera, Kashari omu disiturikiti ya Mbarara.
Omugyenzi amanyirwe nka Akankunda Rita, 25, omutuura wa Bwizibwera.
Abakwatsirwe bamanyirwe nka Javira Byamukama, 19, omukozi w’omu maka ga Namutebi Jolly na Winnie Kembabazi, mura-mukazi w’omugyenzi.
Nikigambwa ngu ahabiro 24.05.2025, omushaho w’amatungo Karegyeya Brighton akaza kuragurira ente za Namutebi Jolly beitu ku ahikire aha geeti, yaabuganaho muhara wa Namutebi omanyirwe nka Kembabazi Winnie omugizire ngu abainazi abatakamanyire baitsire omuramukazi Akankunda Rita.
Karegyeya ku agiire kushwijuma yashanga Akankunda yafiire nikwo kuhababa omushango aha Pooriisi ya Bwizibwera ahi aba Pooriisi baizire n’embwa yaabo enkagiirizi aha mwanya ogu aitiirweho.
Embwa ku ehikire aha mwanya yasiibira omu nju y’omukozi Byamukama Javira nikwo kushutama omu nju ekirugiirireho okukwatwa kwe.
Samson Kasasira, Omugambirizi wa Pooriisi ahabw’ekyanga ekya Rwizi naagira ngu omu kucaaka kwabo, bazoire emyenda eriho eshagama omu kamina y’amaka ga Namutebi Jolly, nyinazaara w’omugyenzi kandi emyendo egyo ebaire eri eya Byamukama.
Byamukama ku abuuziibwe akasyo n’akahindu aha Pooriisi agambire amazima ngu Kembabazi Winnie (muramukazi w’omugyenzi) niwe amuhaire esente kwita Akankunda Ritah.
Nikigambwa ngu Kembabazi Winnie hamwe n’omugyenzi batwire baine obuteikirizana.
Kasasira naagira ngu Kembabazi na Byamukama bakwatsirwe kubaasa kuhweraho Pooriisi omu kucondooza kwayo.
#WestUpdates