Ab’emibazi y’ekiiraguju omuri baashabwa kuhandiikisa emibazi yaabo.

N’ebya Nagudi Fatumah
Kanungu

Abakozi b’emibazi y’ekiiraguju baashabwa kuhandiikisa emibazi yaabo ei barikukora kibaase kubahwera kugaigaharira omumurimo gwabo, obwo barikukora ebihikire.

Hajji Jamil Mukwaya Lutakome, orikukurira abarikukora emibazi y’ekiiraguju omu ihanga kandi arikubakiikirira n’ahakakiiko kakuru aka National Drug Authority, naagira ngu emibazi y’ekiiraguju erimu obugaiga bwingi na munonga orikuba naagukora obwo yaabishomire gye.

Hajji Jamil naagira ngu emibazi egi erimu obugaiga ahabw’okugira ngu buri muntu orikukora omubazi kandi akakiza, buri omwe naaba naamuheereza ekitiinisa. Kwonka ahabw’okugira ngu abaingi abari kugikora tibeegyesiibwe ahakwongyera omutindo gw’emibazi yaabo hamwe n’okugira ngu tibeehandiikiise n’ekitongore kya National Drug Authority, ekirikujunaanizibwa aha mutindo gw’emibazi egi. Jamil nikwo kushaba abantu aba kwejumbira omukutereeza omunkora babaase kuganyirwa omumurimo gwabo.

Ogu, okugamba ebi, yaaba nayegyesa abantu abarikukora emibazi egi omu disiturikiti ya Kanungu ahari Hotel Chimpanzee Nest, omumushomo ogugyendereire kutunguura enkora y’emibazi egi.

Omushomo ogu gwayejumbwamu abakuru kuruga omudisiturikiti egi abarimu RDC, Ceyamaani w’entebe ya 5, omuduumizi wa poorisi DPC omu disiturikiti egi n’abandi kandi aba basiima ab’ekitongore kya NDA ahabw’omushomo ogu bagumize ngu niguza kuhwera kumaraho abanyabishuba abarikweshereka omumurimo ogu bakabeiha abantu; bakabaihaho esente.

#WestUpdates