Abeebembezi ba Mbarara nibenda gavumenti kubangura abeegi ebya first aid.

N’ebya Christopher Ahimbisibwe

MBARARA

Ab’ekitongore ekya Red Cross eitagi erya Mbarara batandiikire ehururu y’okutendeka abaana b’amashomero aha bikwatiraine n’okujanjaba eby’okutandikirwaho (First Aid) n’ekigyendererwa ky’okukyendeza butandu n’okuragurira abarikuba nibenda obuhwezi bwahonaho na munonga omu mashomero.

Abeegi barikukora aha muntu owatunga butandu. PHOTO: Ahimbisibwe Christopher

Amashomero nka; Mbarara Municipal School, Mbarara Junior Mbarara Mbarara Preparatory na Calvary ni gamwe agatungire omugisha gw’okutendekwa okumazire ameezi 6. 

Abeegi bagizireho n’empaka z’okworeka ebi batwire nibeega ah’ishomero erya Mbarara Municipal School.

Abeegi barikwegyezamu ebibashomire omu bikwatiraine na first aid. PHOTO: Ahimbisibwe Christopher.

Okurugiirira ahari Kwizera Goddie- Physical Planner w’orurembo rwa Marara asiimire ekitongore ekya Red Cross ahabw’okutandikaho omuranga gw’okutendeka abeegi omu mashomomero na munonga aga Purayimare. 

Naagira ngu obu nibwe obwire obu gavumenti aine kukwatanisa n’ekitongore ekya Red cross bakatandikaho puroguramu y’okuteendeka abeegi omu mashomero goona ahabwokuba niho ebizibu bingi biri kyahiika aha baana abarikutunga obuhuta barikwenda okuragurirwa kwahonaho.

Ayebazibwe Christine, Omukuru kuruga omu Red Cross agizire ngu ekigyendererwa nokwenda kwegyesa abaana abakiriyo nibakura n’okubatamu omutima gw’okukunda eihanga obwe barikuhwera abandi abarikwetenga obuhwezo. 

Naagira ngu abeegi abatungire okutendekwa obwahati babaire ba memba ba Red Cross ahabwa Mbarara kandi  nibaija kuguma nibabashwijuma obwe barikubongyera obukugu kyahiika aha omu bikwatiraine nokuhwera abantu.

Ahi bigiire kuhenderera eishomero erya Calvary na Mbarara Preparatory nibo batwire ebikopo by’okusinga bwanyima y’okusinga Mbarara Junior na Mbarara Municipal School. 

Abeegi b'eishomero erya Calvary na Mbarara Preparatory nibo batwire ebikopo by’okusinga empaka ezi. PHOTO: Ahimbisibwe Christopher.

#WestUpdates