Abantu 9 bakwatsirwe, embundu 4 zazoorwa – Kampala

Abantu 9 bakwatsirwe, embundu 4 zazoorwa – Kampala

N’ebya John Masaba 

Pooriisi ekwatsire abantu 9 abarikuteekateekwa bari enyuma y’obushuma omu rurembo orwa Kampala na munonga abarikutaahirira ba agenti ba mobile money. 

Fred Enanga, Omugambirizi wa pooriisi naagira ngu omu kikwekweto eki, bazoire n’embundu ibiri. 

Enanga naagira ngu okukwatwa kw’abantu aba kwizireho bwanyima y’ebikwekweto by’amakwatane g’eby’okwerinda aharimu aba CID, pooriisi omuri Kampala n’aba Flying Squad Unit ahabiro 20/6/2023 na 22/6/2023 omuri Nsangi, Kabalagala na disiturikiti ya Kassanda.

Ebikwekweto ebi bibaire bigyendereire okukwata abashuma abanyangaraize abantu omuri Kampala empango

Pooriisi ekwatsire Paul Kasozi ahanguuto eya Wakaliga nikwo kukwata emotoka ye ey’ekiika ekya Mark 2 Grande, namba UAH 874 bakashanga embundu y’ekiika ekya AK 47 erimu amasasi 30 omu boot . 

Okukwatwa kwe kuhwereire omu kukwata bagyenzi be omuri Nabbingo abarimu Geoffrey Luwemba a.k.a General, Arafat Kato Ssempira, Peter Bukenya a.k.a Imran na Akram Wasswa.

Aba baikiriize okwejumbira omukwibisa embundu emirundi ena omwaka ogu.

Obushuma obu harimu okwiba ahari Sylvia Ndagire, orikukora aha mobile money miriyooni 3 ahabiro 15/6/2023 omuri Kyengera, disiturikiti ya Wakiso.

Aba bakaiba miriyooni 1.5 n’amasiimu ahari Brian Nkalubo, agenti wa mobile money omumaduuka aga Kinawa.

Enanga neshoborora ngu bagarukire bakwata Fred Bukenya, orikwebembera guruupu z’abashuma omuri Nsangi. Ogu akwatirwe Kyengera ahanguuto eya Masaka ahabiro 23/6/2023. 

Bakiri omu muhiigo gw’abandi bashuma abarimu Isma Bamujje na Kakooza a.k.a Soldier.

#WestUpdates