Abakozi ba Munisiparite ya Bushenyi beesharingiire

N’ebya Bruno Mugizi

Amagana g’abatuura ababeire nibasherura obuheereza aha ofiisi za kanso ya munisiparite ya Ishaka - Bushenyi bahendeire bashobangiriire nyomwebazyo Orwakabiri 28.04.2026 bwanyima y’abaheereza ba gavumenti kukinga ama ofiisi kandi hoona bakataho akeesharingo k’okukwatsa ebikwato byabo ahansi bagumize ngu ab’eby’obutegyeki nibabataahirira, babaharahaza.

Abahereza aba nibagira ngu bamwe omubanyabutegyeki nibataaha-taaha omumirimo yaabo , babatiinisiriza kandi babaha n’omuraaro mubi omukuta omunkora puroguraamu za gavumenti.

Omwe omubarikwetomboitirwa ni kansara wa waadi emwe omu munisiparity egi, ou abakozi ba gavumenti aba barikugira ngu akaba naaharahaza abakozi ba munisiparite obu babaire nibata omunkora ekiragiro ky’okubinga abarikushuuburira omumyanya etari y’okukoreramu omumatauni

Nikigambwa ngu ebiro 09.04.2026, kansara akavuga motoka ye agyorekyereize ekikoosi ky’abaabeire nibakora ahakubinga abarikukuguriza ahanguuto ekikorwa ekyasigire abakozi 3 aba munisiparite baine obuhuta bw’amaani

Okusherura oburingaaniza

Abakozi aba nibagira ngu, kansara orikugambwaho akavuga motoka ya yaagitaasya omukikoosi ekyabaire nikikora emirimo yaakyo nikwo kuhutaaza abakozi 3.

“Nitwenda oburingaaniza ahabw’abakozi bataahi baitu abaataahiriirwe kansara,” nikwo Shallon Bakira, orikukurira eby’abakozi ahabwa munisiparite, agizire.

“Akavuga motoka ye yaagitaasya omukikoosi ky’abakozi, nikwo kuhutaaza 3. Nitwenda ekitiinisa omubaheereza ba gavumenti, baaba nibakora emirimo yaabo aheeru ya za ofiisi zaabo. Haaba hariho enshonga ezindi, abeebembezi bashemereire kuzirabya omu ofiisi za ba meeya ninga abahwezi baabo omubwire bw’okutaahirira abakozi,” nikwo ayongyeireho.

Bakira beitu hoona arabwire ku okuharahaza oku kwagumizamu kurikubaasa kwita omuhimbo gw’abakozi aba kukora emirimo yaabo okwo omubyanga ahi barikuba bagiire.

Okwetomboitira emikorere ya poorisi
Abaheereza ba gavumenti aba bongyeire bayoreka okwetomboitwa kwabo aha poorisi bagumize ngu ekakyerererwa kugira eki yaakora ahari kansara ogu

Ronald Atubangira Rwabutwagu, orikukora nka Senior Community Development Officer, agizire ngu hari haihi kuhwaho okwezi enshonga egi etwairwe aha poorisi ya Bushenyi, kwonka kansara takakwatsirwe

“Hari haihi kuhwaho okwezi kuruga obu omushango ogu gutwarwa aha poorisi. “Kansara akagamba ekyabaireho, atyo yagyenda, kandi obwo ogu guri omushango gw’amaani,” Rwabutwagui nikwo agizire.

Obwoba omubakozi

Byamukama Julius, omwe omubarikukurira eby’amagara, agizire ngu obwa hati bamwe omubakozi nibatiinirira amagara gaabo baaba nibata ebiragiro bya munisiparite omunkora.

“Ekikorwa ky’omunyabutegyeki kutaahirira omukozi wa munisiparite ari ahamurimo gwe nikyerarikiriza kandi kimara amaani omubakozi,” nikwo Byamukama agizire.

the senior health inspector, said technical staff now fear for their safety while enforcing municipal regulations.

“Ekirikushaasha munonga n’okugira ngu tihariho mwebembezi n’omwe owaajumiriire ekikorwa ky’okutaahirira eki. Obwa hati nitutiina ngu ahabw’okuba abantu nibabaasa kuteekateeka ngu nikiikirizibwa kutaahirira abantu abarikuta ebiragiro omunkora. Mbwenu twakwatsa ebikwato byaitu ahansi kuhisya obu haraagire ekyakorwa,” nikwo ayongyeireho atyo.

Okugyezaho kureetaho obusingye nyomwebazyo Orwakabiri ebiro 28.04.2026 tikubaasikire bwanyima ya Tauni Kiraaka Robert Nuwamanya kugyezaho kugambira abakozi aba okugira obugumisiriza agumize ngu omurukiiko rw’akakiiko ka disiturikiti ak’eby’okwerinda naija kuhayo enshonga zaabo.

“Enshonga zaanyu nzihuriire. Reka mbanze nze omurukiiko rw’eby’okwerinda kandi na bwanyima ninyija kugaruka nimbabuganaho eriizooba omu ihangwe,” nikwo Nuwamanya agizire.

Orikukurira poorisi ya Bushenyi, Peter Azora, nawe agyerizeho kutebeekanisa embeera n’okubatangira okuza omukesharingo.

Beitu hoona abakozi aba bagumiizemu bangire okukora kandi n’emiryango ya ofiisi za munisiparite bagimire bagikingire.

Ahi bugiire kuhikira omu ihangwe, abakozi aba ababeire beesharingire barahiire obutagaruka ahamirimo yaabo okuhisya ahi kansara ogu araakorweho n’obu abanyabutegyeki omumunisiparite baraajumiirire ekikorwa ebikorwa nk’ebi omubutongore.

#WestUpdates