Abainazi baitsire ebyenyanja by’abahagizi ba NRM birikurenga 700 - Kyegegwa
Lucus Abesiga yabarabura okutagyeza bakarya eby'enyanja ebi kandi n'amaizi aga bagaihemu bagaate
Abatuura omuri Karwenyi Ruyonza Kyegegwa baaza kwimuka akasheeshe k'eriizooba baashanga ebyenyanja byabo bifiire, nibizeerera ahamutwe gw'amaizi
N’ebya Philip Murangira
Abatuura okuruga omukyaro kya Kyentare omumuruka gwa Karwenyi omugomborora ya Ruyonza omu disituriki ya Kyegegwa baareebera okutangaara bwanyima y'abainazi kuta obutwa omukidiba ky'ebyenyanja by'abahagizi ba NRM bikahendera bifeire.
Ebyenyanja ebyafa nibirenga omuri 700.
Ekikoosi eki nikimanywa nka NRM Team No Sleep okuruga omukyaro nikyo kimwe
Aba nibagira ngu nk'omuringo gumwe gw'okwetunguura n'okurwanisa obworo, bakacwamu baatandikaho okuriisa ebyenyanja obwo embibo barikugiheebwa aba disiturikiti ya Kyegegwa kwonka baaza kwimuka bashanga eby'enyanja byabo bifeire; biri ahaiguru y’amaizi nibizeereera.
Lucus Abesiga, ow'eby'obushohi ahabwa disituriki ya Kyegegwa yaahika ahabidiba ebi yakyebera amaizi arikukoresa ebyoma bya karimagezi kandi yashanga ngu amaizi gagiremu obutwa obureeteire okubuza omwika gw'ebyenyanja kwitsya.
NRM Team No Sleep nibateekateekwa kuba baafeerwa ebyenyanja birikurenga 700 kandi babaire nibenda kubiguza wiiki egi obwo buri kyenyanja barikukiguza sente eziri ahagati ya shiringi 7,000 na shiringi 10,000.
Aba baashaba abeebembezi na gavumenti kubakwatiraho.
Lucus Abesiga yabarabura okutagyeza bakarya eby'enyanja ebi kandi n'amaizi aga bagaihemu bagaate.
#WestUpdates