Abaana ahanguuto beyongyeire, 20 bagariirwe omumaka gaabo
Abeebembezi n'abatuura omu disiturikiti ya Kyegegwa berarikiriire ahabw'omubaro gw’abaana abarikutuura ahanguuto okweyongyera.
Abaana ahanguuto omuri Kyegegwa beyongyeire, 20 bagariirwe omumaka gaabo...(Photo by Philip Murangira)
Abaana ahanguuto beyongyeire, 20 bagariirwe omumaka gaabo
N’ebya Philip Murangira
Kyegegwa:
Abeebembezi n'abatuura omu disiturikiti ya Kyegegwa berarikiriire ahabw'omubaro gw’abaana abarikutuura ahanguuto okweyongyera.
Eki kibagyemesereize okukwataho bamwe bakabagaruza omumaka g’owaabo n’obu bamwe bakiremeire ahanguuto.
Nikigambwa ngu abaana aba baretsireho emize mibi omu tauni ya Kyegegwa nk’okuteegayera abakazi omumuhanda bakabaihaho enshaho hamwe n’okwiba ab'amaduuka n'emidaara
Abeebembezi n'abatuura omu disiturikiti ya Kyegegwa berarikiriire ahabw'omubaro gw’abaana abarikutuura ahanguuto okweyongyera.
Ekikwekweto ky'okukwata abaana aba n'okubagaruza owaabo kibaire kyebembiirwe Meeya wa tauni kanso ya Kyegegwa, Swaibu Rutangi hamwe na pooriisi ey'eby’amaka n'enshonga z'abaana.
Swaibu Musa Rutangi, Meeya wa Kyegegwa tauni kanso naagira ngu abaana aba baheeza kuguma omu tauni nibaija kuba ekizibu omu tauni ya Kyegegwa.
Twijuke Mugisa omutuura w'omukyaro kya Rweza omu tauni kanso ya Kyegegwa naagira ngu tibakisiga kintu aheeru bakakishangaho ahabw’abaana aba abarikuba nibarabaramu barikwerondesa za ‘scrap' na n’ebicupa.
Abaana abamwe nibaraara omubideeya..(Photo by Philip Murangira)
Tukuratiire abaana aba mpaka omumaka gaabo ahi babaire batorokire kandi tushangire abamwe bakatoroko ahabw'embeera mbi, abamwe ahabw'okufeerwa abazaire baabo kandi abandi ahabw’okuba endeeme n’okwanga kushoma okurugiirira ah’abarikubareeberera.
Kishangirwe ngu abaana abamwe bakaruga omu kampu y'empungi eya Kyaka II, abandi bakaruga omu za disiturikiti ezehinguriire Kyegegwa n’abandi omuri Kyegegwa.
Abaana abamwe nibagambwa kuba batoorokire omu kampu y'empungi eya Kyaka II
Omubwiire bwa shaaha 7 z'ekiro, omunyamakuru waitu ahiikire n'omukatare ka Kizigati aharubaju rw’akatare aka Kyegegwa Central market omu tauni ya Kyegegwa ahi abaana aba barikuraara kandi ashangire aba barikuraara ahansi y'emidaara y’abashuubuzi obwo barikweshweka ebideeya.
Eky’obusaasi n'omwaana omwe owu bagarwiize owa nyinenkuru omukyaro kya Wekomiire omu tauni kanso ya Kyegegwa nawe twongiire twamushanga ari n’abandi omukizigati omubwiire bwa nyekiro kandi tutungire okumanyisibwa haine abantu abarikukoresa abaana aba omumwanya nigwo gumwe.
#WestUpdates