Aba NRM abarikwenda kujwekyera Uganda omu EALA mureeta okushaba kwanyu- Dr Odoi.

N’ebya Omushaki weitu

KAMPALA

NRM neshaba abarikwenda kwesimba kujwekyera Uganda omu eishengyero rya East Africa okuhayo okushaba kwabo.

Okurugirira ahari NRM, okuhayo okushaba kwesimba ahantebe ezo kutandikire nyomwabazyo Orw'okubanza kandi nikuhendera nyencakare Orwakashatu reero okuhandiika abarikwenda kwesimba kutandikye. 

Entebeekanisa ezi zoona nizeija kuhendera abany’eishengyero b’ekigombe ekya NRM barikuteera akaruuru aharwakataano ebiro 27.03.2026.

 Eki nikijaho bwanyima ya Sipiika wa Paramenti, Anita Annet Among okuragira ebigombe by’obutegyeki na munonga ekigombe ekya NRM okurahusyaho entebeekanisa z’ekigombe omukwetegurira okugarukamu akaruuru k’okutoorana abajwekyere Uganda omu Paramenti ya East Africa.

Arikugambaho n’abanyamakuru aha ofiisi z’ekigombe kya NRM omuri Kampala ahabiro 23.03.2026, orikukurira akakiiko k’eby’oburuuru ak’ekigombe ekya NRM, Dr Tanga Odoi nagira ngu emyanya egi ekasigaramu busha bwanyima y’abajwekyerwa ba Uganda ababaire bagirimu, Denis Namara na James Kakooza Mutagubya okusinga akaruuru k’okujwekyera ebyanga byabo omu Paramenti ya Uganda ey’omurundi gwa 12 omu karuuru ka boona akateirwe omu kwezi kw’okubanza, 2026.

Ekiragiro nikiragira okwijuza emyanya egyo omu biro 90 byonka.

Dr Tanga Odoi nagiira ngu bwanyima y’okuragiira kwa Sipiika Among, NRM neshaba abarikwenda kwesimba aha ntebe ezo okuhayo okushaba kwabo obutarenga ebiro 25.03.2026.

Omu baherize kworeka ekiteekateeko ky’okwesimba ahantebe egi kujwekyera Uganda omu Paramenti ya East Africa barimu Rosemary Nyakikongoro, Omuny’eishengyero-kazi ahabwa disiturikiti eya Sheema oherize kusingwa akaruuru ahantebe niyo emwe omuri Sheema.

#WestUpdates