Aba Lira bacuramiriirwe bwanyima ya tauni kiraaka waabo Tibihika kugwa omuri butandu.
Kanso y’orurembo rwa Lira eteebekaniise orushutamo rwa kanso y’omutaano eriizooba Orwakabiri kubaasa kwinamira tauni kiraaka wa Lira, Theophilus Tibihika ofiire.
Kanso y’orurembo rwa Lira eteebekaniise orushutamo rwa kanso y’omutaano eriizooba Orwakabiri kubaasa kwinamira tauni kiraaka wa Lira, Theophilus Tibihika ofiire. File Photo.
N’ebya Hudson Apunyo
LIRA
Abantu b’omu rurembo orwa Lira bagwire omu kahuuruko nekyekango bwanyima y’okufa kwa Theophilus Tibihika, tauni kiraaka w’orurembo orwa Lira ogwire omuri butandu y’amotoka omu disiturikiti eya Kole.
Omutumbi gwa Tibihika ogubaire gusibire orukoba gushangirwe omu motoka ya Double-Cabin Pickup ehandiikirwe omu namba ya UAM 450V ei abaire navuga aharw’okubanza.
Butandu egi ebaire ahari Bar Dok Oculi omu gomborora eya Akalo aharuguuto ny’eigyendwa orwa Lira-Aduku omu disiturikiti eya Kole.
Butandu egi eshanyariize emirimo aha kishengye ky’empanura z’orurembo orwa Lira obwo abakozi boona bashobangiriirwe.
Enkiiko ezibaire nizigyenda omu maisho zigumizemu omu ofiisi ya Meeya wa Lira obwo abakozi barikwebuuza munonga ahabw’enki kiraaka w’orurembo abaire akiri aheeru omushaaha z’ekiro, ajwire empire ngufu erikwiragura hamwe n’esaati ya blue.
Abeerebire nagabo nibagira ngu esimu ya Tibihika, Reediyo y’omu motoka n’ebindi bintu ebi abaire aine bibaasa kuba byibirwe bwanyima ya butandu egi kubaho.
Robert Okello Ayo, Orikukora nk’omugambirizi w’orurembo orwa Lira naagira ngu amakuru ga kiraaka wa Lira kugwa omuri butandu abandize kugareeba aha mikura ya kanyabwengye gyete ‘Social Media’.
“Ku tuhukire aha mwanya, tushangire ngu tauni kiraaka agwire omuri butandu egi kandi emotoka esisikaire munonga,” Okello arikushoborora.
Naagira ngu bashangire Tibihika yaherize kufa obu bamwihire omu motoka.
“Titurikumanya ahu abaire naza, titurikumanya ekibaireho, tugweriirwe akagwe ahabw’okufa kwe,” Okello arikwongyera kushoborora.
Nayongyeraho ngu kanso y’orurembo rwa Lira eteebekaniise orushutamo rwa kanso y’omutaano eriizooba Orwakabiri kubaasa kwinamira tauni kiraaka weitu ofiire.
Sam Arul, Meeya w’orurembo orwa Lira agizire ngu atungire amakuru ga butandu egi ebaire omu disiturikiti eya Kole omukasheeshe k’orw’okubanza haihi n’omwatano gwa disiturikiti eya Kwania.
Butandu egi ebaire erimu Tibihika kandi ku tugiire kuhika aha mwanya tushangiire ari omu motoka ye afiire.
Arul akyorekire ngu Tibihika obaire amazire omwaka gumwe n’ameezi 2 ari tauni kiraaka wa Lira abaire ari omukozi orikwehayo kandi w’emicwe mirungi omu kukora omurimo gwe.
#WestUpdates
#RadioWestAt25