5 baagwa omuri butandu ya motoka 3 omuri Kiryandongo

N’ebya Yosam Gucwaki

Abantu 5 baafeeraho kandi abandi 15 baine obuhuta bw’amaani bwanyima y’emotoka 3 kushengurana omukyaro kya Siriba, tauni kanso ya Bweyale omu disiturikiti ya Kiryandongo aharuguuto rwa Kampala Gulu.

Butandu egi, eyaaba erimu baasi 2 ez’abashaabazi hamwe n’ekimotoka kihango, yaabaho omukiro ekyabusheesha eriizooba shaaha nka 7.

SP Stephen Ojok, omuduumizi wa poorisi ya disiturikiti ya Kiryandongo, yaayegyekyerera butandu egi ahakimotoka kya Sinotruck kihandiikire omu namba ya UBF 576B ekibaire kyemereire aharuguuto bwanyima y’okufa.

“Dureeva wa baasi ya Mega Express ebaire neeruga Gulu, ku ayiriire haihi n’ekimotoka eki, yaateekateeka ngu kiriyo nikitambura nikwo kuremwa kusiba atyo akakitaahiramu arikukireetwa enyima, kikeeyongyerayo kikagwa omukiina. Omukaire kakye, baasi ya Nile Coach ebaire eri ahanjungu y’amaani nayo ehoneire hakye kushengura baasi ya Mega Express nikwo kugyekuubaho, ekaruga aharuguuto ekeerabamu.

Baasi ya Nile Coach tesiisikaire munonga; nk’eya Mega Express, eitsire abantu 5 oteiremu n’encuukye y’ameezi 3. Abahutaire, obwa hati, bariyo nibatunga obujanjabi ah’irwariro rya Kiryandongo General Hospital,” nikwo SP Ojok yaashoborora.

N’obu ekireetsire butandu kitakamanyirwe kurungi, SP Ojok tahakaniise enshonga y’okuvuga enjungu hamwe n’obutahweza kurungi ahabw’embeera y’ekiro

#WestUpdates