3 ab’eka emwe bakwatsirwe pooriisi ahabw’okuteekateekwaho kwita ow’emyaka 57

N’ebya Bruno Mugizi

Sheema:

Abantu 3 kuruga omuka emwe bakwatwa pooriisi omu disiturikiti ya Sheema ahabw’okuteekateekwa kuba baitsire omushaija w’emyaka 57.

Oitsirwe ni Biryomumisho Ezekiel, omutuura wa Nyamushebeya cell, omuruka gwa Kyihara, egomborora ya Kasaana omu disiturikiti ya Sheema orikugambwa kuba aitsirwe omukiro ky’abusheesha eriizooba.

Martial Tumusiime, Omugambirizi wa Pooriisi ey’ekyanga ekya Bushenyi empango naagira ngu abakwatwa harimu Aturinda Stuart, 34, mutabani w’omugyenzi, Akankwasa Annet, muka-omugyenzi na Nuwagira Obed, boona abatuura b’ekyaro nikyo kimwe.

Nikigambwa ngu eka egi etwairemu emihondano ahabw’eitaka eri Biryomumisho abaire nayenda kuguza kushashura looni beitu ab’eka ye bangire.

Martial naagira ngu omwe ahabatabani, Stuart, orikutuura Ntungamo abaire naryana n’ishe ahabw’ah’okwombeka enju. Ogu aizire nyekiro kandi nateekateekwa kuba ari enyuma y’okwitwa kw’ishe, owashanga afeereire omu musiri gw’omuriranwa.

#WestUpdates
#RadioWestAt25