Mu 2014, waliwo mwana muwala Jamira eyankubya amameeme nga naakamulaba era ne mmutokota.

Jamira yali asoma ku yunivasite e Makerere era yandaga omukwano gwe nnali sirabangako.

Bukya mbeerawo, nnali siganzangako ku muwala muyivu ng’oyo kubanga nnali mbatya nga mbayita bayaaye naye ekyansikiriza okuganza Jamira, gwe mukwano omungi gwe yandaga, empisa n’eggonjebwa ate ng’ampa ekitiibwa.

Olw’emirimu gyange, nateranga okumala ebbanga eriwerako nga sikubye mmunye ku mwana muwala ono naye ng’andaga nti buli kimu kiri bulungi kuba twawuliziganyanga kumpi buli lunaku.

Jamira yatandika okuηηamba ebyetaago bye era ne nneewaayo okubimuwa. Naye ekiseera kyatuuka nga ndaba asusse okunsaba ssente nga buli lwe mmukubira ng’ansaba ssente ne bye sitegeera.

Yansaba fi izi, kkoosi waaka, ez’okugenda ku ngendo, eza hostel mw’asula, ez’enviiri n’ebirala bingi.

Mu kusooka nnali nzimuwa kuba nnali ndaba ng’anjagala naye akaseera kaatuuka nga sikyafuna ssente nga bwe nnali nzifuna naye ng’omuwala ne bwe mmugamba tawuliriza ate nga bwe muwa entono ku z’aba ansabye olwo taddamu kukwata ssimu naye ate nga bwe mmala ne nzimuwa ng’andaga essanyu.

Kino saasooka kukifaako, naye lumu nakomawo mu Uganda nga sirina bulungi ssente ne musaba okumulabako n’aηηamba ku ssimu “swiiti bw’oba ozze ne ssente jangu naye bw’oba tozirina totawaana kulinya eno.”

Eeeeehhhhh ekyo kyaneewuunyisa kubanga ne we yali asula we yali aηηaana okugenda nze yali asasulawo. Olw’okuba nnali mmwagala, neekwatakwata ne nfunayo akasente ne muwa nsobole okumulabako waakiri.

Nga wayiseewo wiiki emu, nafuna essimu okuva ku mulimu nti gwali guweddewo era nga nsabiddwa okunoonyako awalala era bwentyo ne mbibuulira munnange nga bwe byali.

Aaaahh saamanya nti ate nnali nnyonoona n’akatono akaaliwo kubanga mwana muwala yatandika okuneegobako nga takyakwata ssimu yange ate nga ne bwe nkubira mikwano gye nabo tebakwata.

Kino kyantwalira omwezi mulamba nga neebuuza lwaki omuwala ono yankyawa okutuuka kw’ekyo.

Namukubira ku ssimu ya mukwano gwange gw’atamanyi ne mmusaba tusisinkane n’akkiriza.

Olwamulaba ne mubuuza lwaki yali tankyandaga laavu wadde okukwata essimu yange n’anziramu nti ye tasobola kugumiikiriza muntu atalina mulimu era nti mwesonyiwe.

Nawulira ennaku kuba nnali sikisuubira kuba Jamira nnali mukoledde bingi ng’ate yali yansuubiza n’okunzaalira ku mwana.

Naye bwe nabimujjukiza n’aηηamba nti tasobola kunzaalira. Ekyo kyamenya omutima kubanga nnali mwekuumidde so nga nalabanga abawala ab’enjawulo naye nga mbalaba bulabi.

Nga wayise emyezi esatu, namusangako n’omu ku basajja be nakolanga nabo nga balya bulamu mu kafo akamu e Kaseese naye saamweraga era saamanya nkolagana yaabwe kubanga okuva lwe yankyawa namwesonyiwa.

Kati noonya ssente sikyamulowoozaako lwakuba omutima gunnuma naye ntya nti osanga bwe naddamu okufuna omulala naye ajja kumpisa atyo.

Bannange nkole ntya?

Tribute: Joshua Muvumba - a literary giant falls silent

Despite his privileged background, he curved out his own path in life

Dr Joshua Muvumba and the writer Dennis Katungi

Tags: