Abatunda Solar z'ebicupuli bubakeeredde: UNBS erangiridde ebikwekweto okubafuuza
Jaliat Namuwaya
Journalist @New Vision

Abasuubuzi baweeredwa emyezi 2 gyokka okwetereza era ebikwekweto byakutandika okuva nga 1st July.

Bino byatuukiddwako eggulo ku Lwokuna aba UNBS bwe baasisinkanye abasuubuzi mu Kampala okubajjukiza ensonga y'omutindo oluvannyuma lw'okukola okunoonyereza ne bakizuula nti solar ezitundibwa ebitundu 70 ku 100 kw'ezo eziri ku katale omutindo gwa kibogwe .

Omumyuka w'akulira ekitongole kya UNBS Patricia Ejalu agambye nti agamu ku mateeka amapya abatunda solar ebyuma bino ge balina okugoberera mwe muli okunnyonnyola bakasitoma obuwanguzi bwa solar ze batunda ,okubawa akadde akamala 'warranty' nga basobole okuzza 'solar panel' singa ebeere tekoze wamu n'ebirala.

Wabula abatunda n'okusuubula  'solar panel' naddala mu Kampala bino olubagudde mu matu ne beewuunya UNBS olw'okwefuulira nga mu kiti ng'embazi nga bagamba nti UNBS evunaanyizibwa ku mutindo gw'ebyo ebiyingira mu ggwanga ate ebitali ku mutindo bibayitako bitya okuva mu mawanga amalala okutuuka ku katale ka Uganda balyoke bakisse ku basuubuzi .

Basabye okubawa akadde akamala bamale okutunda solar panel ze balinawo olwo sitooko eggweewo balyoke batandike ebikwekweto byabwe oba si ekyo babaliyirira kuba si beetegefu kufiirwa mmaali yaabwe batyo.

Everest Kayondo, ssentebe w'ekibiina ekigatta abasuubuzi mu Kampala ekya KACITA ,agambye baakwongera okwetegereza okusaba kwa UNBS yadde nga era akuutide abasuubuzi okussa mu nkola ebibasabiddwa okwewala okutataaganyizibwa.

ADVERTISEMENT

Related Articles

No Comment


(adsbygoogle = window.adsbygoogle || []).push({});