WAZZEEWO akasattiro mu bitongole by'ebyokwerinda nga kava ku lukalala lw'abantu abaakwatibwa, Pulezidenti Museveni lwe yalagidde bafulumye mu bwangu ensi etegeere nti abantu tebawambibwa buwambibwa wabula bali mu mikono gy'abeebyokwerinda.

Joseph Katongole eyakwatibwa okuva e Mpigi.

Kati ziweze ennaku ssatu bukya Museveni alagira ebitongole ebikuumaddembe okufulumya olukalala luno naye terunnafulumizibwa. Pulezidenti Museveni bwe yabadde ayogerako eri eggwanga ku Lwomukaaga yalagidde okufulumya olukalala lw'amannya g'abantu bonna abaakwatibwa, abantu baabwe bagume.

Ensonda zaategeezezza Bukedde nti enkalala ezaaweebwa Pulezidenti zaava mu bitongole eby'enjawulo okuli CMI, JATT n'olwava mu kibinja kya Bakomando era nti enkalala zonna zirina okusooka okusunsulwa nga tezinnafulumizibwa.

Kyokka kigambibwa nti wabaddewo okukoonagana ku kitongole ki ekirina okutegeka olukalala olwawamu era ng'abakulira ebitongole ebimu baagala poliisi y'eba etegeka olukalala olwo, kyokka nga kyabadde tekinnasonjolwa. Kigambibwa nti poliisi yalekebwa bweru mu bikwekweto mwe baakwatira abantu abasukka mu 200 era n'ekitongole kyayo ekya Crime Intelligence ekikulirwa Brig. Sserunjogi Ddamulira ekyenyigira mu bimu ku bikwekweto kyakolera wamu n'ebitongole by'amagye nga poliisi z'ebitundu tebaziyingizzaamu.

"Poliisi terina lukalala lwonna era olukalala ku baakwatibwa lugenda kuva mu magye agaakola ebikwekweto ebisinga obungi." Ensonda mu byokwerinda bwe zaategeezezza. Eggulo aba NUP baafulumizza olukalala lw'abantu be bagamba nti baakwatibwa ebitongole by'ebyokwerinda mu kiseera kya kampeyini, mu kalulu ne mu kiseera ng'akalulu kawedde.

Kino kyayongedde ebibuuzo ku bantu abakwatibwa era abantu ne bayita ku mikutu gya yintaneti egy'enjawulo nga basaba gavumenti efulumye olukalala Pulezidenti lwe yajuliza, ffamire z'abantu abaakwatibwa zigume.

LWAKI OLUKALALA LULIKO ENKALU Ng'oggyeeko eky'okubeera ng'olukalala lulina okusooka okutereezebwa, ensonda zaategeezezza nti eky'okubeera nga waliwo ebitakwatagana wakati w'ebyo ebiri ku lukalala Pulezidenti bye yabadde asoma n'ebyo ebiri ku byalo gye baakwata abantu bireeseewo akasattiro. Okugeza e Kyotera, Pulezidenti gye yagambye nti baakwatayo abantu 17, ate abatuuze ku kyalo Kisammula balina olukalala oluliko abantu 18 era beebuuza omuntu omu we yalaga.

E Mukono Pulezidenti gye yategeezezza nti abaakwatibwa bonna baayimbulwa, ate abatuuze bagamba nti waliwo abatuuze baabwe mukaaga abatannayimbulwa era abaayimbulwa nti bali 11 ate ng'abaakwatibwa bali 17. Waliwo okutya nti obutakwatagana mw'ebyo abaserikale bye balina ku lukalala n'ebiri mu bitundu birina okusooka okutereezebwa ng'olukalala terunnafuluma.

Okusika omuguwa okulala kuli ku ky'okussaako ebifo abaakwatibwa we bakuumirwa kubanga kino kye kibuuzo ekinene aba ffamire kye balina era olukalala okumatiza abantu lulina okulaga abaakwatibwa gye baasibirwa, ffamire zaabwe zisobole okugoberera okuzuula embeera mwe bali.

Kino era kirimu n'akalippo akalala ak'abantu abagambibwa nti baatulugunyizibwa nnyo era ng'olumala okufulumya olukalala, ekiddako ziba ffamire z'abantu abo okugenda mu bifo gye bakuumirwa okulaba ku bantu baabwe ekiyinza okwongera ennyiike nga basanze abantu baabwe bali mu mbeera embi.

Brig. Flavia Byekwaso omwogezi w'amagye bwe yatuukiriddwa ku by'okufulumya olukalala yagambye nti omwogezi wa Gavumenti yalina obuvunanyizibwa okwogera ku nsonga eno. Abeebitongole ebikuumaddembe mu lukiiko lwa bannamawulire lwe baabadde nalwo eggulo tebaalambise ddi lwe bagenda kufulumya lukalala luno.

AIGP Abas Byakagaba akulira ekitongole ekirwanyisa obutujju, Lawrence Nuwabine akulira poliisi y'ebidduka ne AIGP Edward Ochom akulira ebikwekweto bya poliisi beebamu ku baabaddewo okunnyonnyola ku mbeera y'obutebenkevu mu ggwanga.

Brig. Christopher Sserunjogi Ddamulira akulira ekitongole kya poliisi ekikessi (Crime Intelligence) yagambye nti oluvannyuma lwa Pulezidenti okwogera ku nsonga eno kyabadde kibeetaagisa okutuula bafune omuwendo gw'abantu bonna abazze bakwatibwa.

Ensonda mu Poliisi zaagambye nti olw'okuba ng'abasibe okusinga bazze bakwatibwa ekitongole kya magye ekikessi ekya CMI be balinze okubawa olukalala lw'amannya ge balina kubanga ge gasingako obungi. Mu kiseera kino poliisi nti ssi y'erina abasibe aboogerwako.

Mu kwogera kwa Pulezidenti yayogedde ku bibinja bya mirundi ebiri omuli ekibinja kya bakomando abaakava e Somalia n'ekitongole ky'amagye ekikessi.

Death of lions a blow to Uganda’s tourism

The loss of these lions is another blow to Uganda’s tourism industry which has been financially crippled by the COVID-19 pandemic.

Death of lions a blow to Uganda’s tourism

By NewVision Reporter

Journalists @NewVision