PENINAH Kabingani Busingye ‘Maama Kisanja’ 77, alondeddwa okuba omubaka w’abakadde ba Buganda mu Palamenti asookedde ddala.

Okulonda kwabaddewo eggulo ku kitebe ky’essaza lya Kasana Luweero nga kwetabyemu abalonzi 134. Disitulikiti za Buganda 27 buli emu yakiikiriddwa abakadde bataano abaalonze.

Maama Kisanja owa NRM obululu yabwezezza lweyo bwe yafunye obululu 113, n’addirirwa omuyimbi Halima Namakula Kiwanuka eyafunye 9, Claudia Naluyima Kamya yafunye 8, Francis Babu baamulonze 3 ate Israel Mayengo yafunye kamu.

Abeesimbyewo bonna baasoose kuweebwa mukisa gweyogerako eri abalonzi ng’okulonda tekunnaba. Idi Kahawa ne Aminah Namaganda Ssempa be baakuliddemu okulondesa.

Maama Kisanja yeebazizza abaamulonze ne yeeyama okubaweereza n’omutima gumu okulaba nga bakyusa embeera mwe bali.

Laura Kanushu Owa Nrm (ku Kkono) Omu Ku Beesimbyewo Okukiikirira Abaliko Obulemu Ng’ayogerako N’abalonzi Abaakuhhaanidde Ku Civil Service College Of Uganda E Jinja Ku Mmande.

ABAKOZI BALONZE
Agnes Kunihira yalondeddwa ku kifo ky’omubaka omukazi ow’abakyala ng’afunye obululu 322 n’addirirwa Annet Birungi eyafunye 161. Okulonda kwabadde ku ssomero lya Kibuli SS.

We twagendedde mu kyapa ng’okubala obululu ku bifo ebisigaddeyo ebina nga tekunnaggwa, kyokka ng’okuvuganya okwamaanyi kwabadde wakati wa; Charles Bakabulindi, Arinaitwe Rwakajara, Margret Rwabushaija, Dr. Sam Lyomoki, Usher Wilson Were, Agatha Namirembe, Annet Birungi ne Haji Twaha Kigundu.

Abalala kwabaddeko; Robert Wanjushi, Anthony Wanyama, Anthony Obuku Okware, Stuart Obita, Erisha Ankunda, Moses Nuhtwemeirwe, Marry Apuni ne Pascal Madum.