Bya Brian Meembe

Ebadde nnaku njereere ku kyalo Kireka abakungubazi nga bakuba eriiso evannyuma kw’ abadde kafulu mu kutabula n’okukuba ennyimba enkadde ezibadde zisanyusa Bannayuganda.

Omusumba w’Obusumba bw’e Bbira mu Busabadinkoni bw’e Nateete Rev. David Ssekiziyivu akuutidde abantu okubeera oboomugaso mu kitundu mwe bava babeenyumirizeemu nga bafudde.

Rev.Ssekiziyivu okwogera bino abadde akulembeddemu okusaba mu maka ga munna  mawulire era omutabuzi w’emiziki amanyiddwa ennyo nga Dj.Emma abadde omukozi ku leediyo ya Kabaka CBS.

Ekifaananyi Kya Dj Emma.

Maseege Emmanuel abadde munnamawulire era nga DJ. Afiridde ku myaka 41. Alese abaana babiri ne nnamwandu nga w’afiridde ng’ atawanyizibwa ekirwadde ky’ensigo.

Rev.Ssekiziyivu yennyamidde olw’ bavubuka abasukkiridde  amalala, okuli okwemulisa ng’enjogera y’ennaku zino bw’eri olw’amannya ge baba bakoze n’asaba katonda okubabeera.

Avumiridde abantu abalowooza okutemula bannaabwe olw’ebifo bye babeeramu n’abasaba okudda eri katonda.

Maama w'omugenzi  Sayida Wanyanze yeebaziza nnyo Abaganda okusembeza Emma ne bamufuula omwana mu nju awatali kumusosola .

Abantu ab’enjawulo boogedde ku mugenzi ng’ omuntu w’abantu akoze ekisoboka okulaba ng’a akwata ku buli muntu nga ssentebe w’ekyalo kino Mathias Ssengonzi bw’annyonnyodde.

Emma yafa Lwakubiri wiiki ewedde mu ddwaliro gye yali atwaliddwa okujjanjabibwa .

Olw’ebirungi n’enkulaakulana bw’akoledde ekitundu kye ekya Nabukalu e Kireka Bbira ono bamubbulamu n’oluguudo okumusiima.

Mukyala w'omugenzi, Prisca Nakafeero yeebaziza nnyo abantu abamubereddewo okuva bba lwe yalwala okutuusa lwafudde awatali kwekaanya.

 Ategeezezza nga bba bw'abadde nga kitaawe era nga waakumusubwa nnyo nga kuno kw’otadde n'abawagizi be.

DJ Emma waakuziikibwa mu disitulikiti y’e Namutumba era ng’ okusaba kuwedde omubiri gye gutwaliddwa.

Akulira ebyamawulire mu gavumenti y’e Mmengo, Kiwalabye Male  ayogedde ku DJ Emma ng’abadde omwetoowaze ate ng amukozi nnyo nti era ne bw’abadde omulwadde abadde ajja n’akola n’agamba nti bajja kumusubwa nnyo.