Temuwa baana masimu - Nnabagereka

 Bya Dickson Kulumba

NNABAGEREKA Sylvia Nagginda alabudde abazadde ku bulabe obuli mu kuwa abaana amasimu n’asaba abakikola okukikomya mbagirawo.

Agambye nti amasimu kuyiti­rako obuseegu n’emize emirala.

Bino yabyogeredde mu Kisaa­kaate kya Nabagereka ku ssomero lya Hormisdallen P/S e Gayaza mu disitulikiti y’e Wakiso gye yatudde n’abaana n’ababuulirira gattako okubayigiriza emirimu gy’awaka.

Nnabagereka yayaniriziddwa abatandisi b’essomero lino okuli Dayirekita Mukalazi Kizito ne mukyala we Ritah Mukalazi, omukulu w’essomero Nickson Kalyango be yeebazizza olw’okuk­yaza Ekisaakaate 2024.

Abayizi abasukka 400 be bali mu Kisaakaate kino eky’omulundi ogwe 17 nga kyatandise January 4, 2024 wansi w’omulamwa: Oku­lafuubanira obuntubulamu.

Abaana bano bayigirizib­wa ebintu eby’enjawulo omuli ebyemikono, obulimi, ebyobu­wangwa, okuwaata emmere, okus­iba empombo, okufumba, okutun­ga, n’ebirala bingi. Bino byonna Nnabagereka yabirambudde.

Abaana beebazizza Nnabagere­ka olw’okutandikawo Ekisaakaate kino ekibayambye okuyiga ebintu bingi omuli n’olulimi Oluganda olubakaluubiriza ennyo ensangi zino olw’okuba amasomero gye basomera tebafuna mukisa kuluy­iga bulungi.

“Maama Nnabagereka nkweba­za olw’okututeerawo Ekisaakaate. Nze ekimu ku byasinze okundeeta mu Kisaakaate kwe kwongera okuyiga Oluganda kubanga tu­beera eka n’olowooza nti omanyi Oluganda naye nga lufu ate ne mu masomero gye tubeera, tetufuna mukisa kwegazaanyiza mu Lugan­da,” Margaret Nakivumbi 19, bwe yabuulidde Nnabagereka.

Bwe yatuuse mu baasomesed­dwa ebikwata ku kwewala ebiragalalagala, Nnabagereka yabalabudde okwewala okuwubis­ibwa okuva mu bato bannaabwe kubanga ebiragalalagala bino byangu byakwonoona ebiseera byabwe eby’omu maaso.

Fred Kabuye, avunaanyizibwa ku by’amawulire mu kitongole ekivunaanyizibwa ku mutindo gw’eddagala mu ggwanga ekya NDA yategeezezza ng’Abasaakaate bwe baabasomesezza ebintu bingi ebiri mu bulabe obw’okukozesa obubi eddagala era n’asaba aban­tu okukomyanga okwejjanjaba bokka nga tebafunye kuwabulwa okuva mu basawo abakugu ek­intu kye yagambye nti kyabulabe ddala.