Omuyaga gukubye ekinaala ne gukyabulazaamu wakati abantu 4 ne balusuulamu akaba!

Abantu 4 be bakakasiddwa okubanga bafiiridde mu nnyanja Nalubaale oluvannyuma lw’ekinaala mwe babadde okukubwa omuyaga ogwa maanyi ne kibejjukamu.  

Eryato lino ery’abasabaaze libadde liva ku mwalo gw’e Kisaba ku kizinga Bukasa mu bizinga by’e Ssese nga lidda Katosi mu Mukono.  

Lino libaddemu ensawo za Manda, Mukene ebyennyanja n’abantu. Kitegeerekese nti lyasimbudde ku ssaawa 10:00 ez’ekiro era omuyaga ogw’amaanyi gulikubidde mu mazzi g’e Nsazi.  

Okusinziira ku Kyagulanyi Kabunga omu ku bakulembeze mu mwalo gw’e Kisaba, amawulire gano baagafunye ku ssaawa 3:00 ez’oku makya kyokka engeri eryato gye lyasimbudde ekiro tebamanyi muwendo gwa bantu baalibaddemu.  

“Twakakakassaako abantu bana okubadde Kiberu, maama n’omwana eyayidde omuliro ng’abadde amutwala mu ddwaaliro n’omuvuzi w’eryato lino,” Kabunga bwe yategeezezza.  

Abantu 9 ku abo ababaddemu bataasiddwa eryato eribadde livuba. Guno si gwe mulundi ogusoose ebinaala okuva e Kisaba okuyiwamu abantu.

Mu 2016 abantu 9 baafiirawo abalala 11 ne bataasibwa nga ne mu mwaka oguwedde emmaali yatokomoka ekinaala ekyali kiva e Kasenyi okudda e Kisaba bwe kyayiikamu abantu 8 ne bataasibwa.  Tukyagoberera emboozi eno okukutuusaako ebirala.