ABAKAZI be baasibira abantu baabwe mu bifo ebitamanyiddwa balaajanidde mu Kimeeza kya Bukedde nga balumiriza ekitongole kya ISO nti kye kyabakwata era abamu bamaze mu buduukulu ebbanga erisukka mu mwaka naye nga tebatwalibwa mu kkooti.

Abantu baavudde mu Kampala, Wakiso n'ebitundu by'eggwanga ebirala ne bajja ku kitebe kya Vision Group etwala ne Bukedde ku Lwomukaaga okwetaba mu Kimeeza ekitegekebwa buli luvannyuma lwa myezi esatu okwogera ku misango n'engeri gye gitambuzibwamu, wamu n'eddembe ly'obuntu.

Enteekateeka eno ewagirwa ekitongole eky'obwannakyewa ekya Democratic Governance Facility (DGF) mu ntegeeragana gye baatuukako ne Vision Group okuyambako abantu okwanguyirwa okufuna obwenkanya n'okutumbula eddembe ly'obuntu.

Ekimeeza kino kyetabiddwaamu abantu abaavudde mu bitongole by'ebyamateeka eby'enjawulo, okwabadde Omulamuzi Vincent Emmy Mugabo ayogerera essiga eddamuzi, Cornelius Beyanga okuva mu kitongole kya poliisi eky'ebyamateeka n'eddembe ly'obuntu, Maj. Gen. Samuel Kawagga aduumira ekibinja ekisooka ekya UPDF e Kakiri era nga y'avunaanyizibwa ku ba LDU mu Kampala n'emiriraano; Joyce Nalunga akulira ekibiina ekigatta bannamateeka ekya Uganda Law Society, Goreth Ayebare akulira ekibiina kya bannamateeka ba gavumenti abawolereza abantu ku bwereere ekya Justice Centers Uganda, Sumayah Nankya owa Muslim Centre for Justice and Law, ne Dennis Obbo, mwogezi wa Minisitule y'ebyettaka.

GDF yakiikiriddwa Dorah Mafabi, Francis Sserwadda ne Lucy Nantume. Waabaddewo weema ya bannamateeka okuva mu Justice Centres, Uganda Law Society ne Muslim Centre for Justice and Law ng'abantu obwedda abannyonnyola ebizibu byabwe, bakwasibwa bannamateeka abaabadde mu weema eyo okukola ku nsonga zaabwe. Bangi baabadde n'ensonga z'ettaka nga balaga obutali bumativu ku ngeri ebitongole eby'enjawulo gye bitabayambye kufuna bwenkanya.

Mu bantu abangi abaayogedde ebibaluma ebibalemesezza okufuna obwenkanya mwe mwabadde n'abakyala basatu ab'enjawulo ng'omu baasiba omwana we omwaka oguwedde nga n'okutuusa kati tamanyi mwana gy'akuumirwa ate abakyala ababiri baabasibira babbaabwe nga nabo tebamanyi baami baabwe abo gye baabasibira.

alenda ngalaga ekifaananyi kya bba eyabuzibwawo

alenda ngalaga ekifaananyi kya bba eyabuzibwawo

Galenda ng'alaga ekifaananyi kya bba eyabuzibwawo.

BBA WANGE BAAMUKUUMIRA KU KIZINGA E KALANGALA Aisha Naluyange, ow'e Bulenga mu Wakiso yagambye nti bba Deo Ssegawa baamukwata May 22, 2018 era kati awezezza omwaka gumu n'emyezi esatu nga tebamanyi gy'akuumirwa. Naluyange yattottodde bw'ati:

Omwami wange bwe yakwatibwa omuntu omu yankubira n'ang'amba nti atwaliddwa Kyengera mu kasenge akamu. Nakubira Col. Kaka essimu n'ang'amba nti kituufu y'amulina wabula akyanoonyerezebwako. N'okutuusa kati siddangamu kumulabako nga simanyi oba mulamu oba mufu.

Naluyange ayongerako nti oluvannyuma lwa ISO okuzuula nti yali ategedde bba gyali e Kyengera, bamuggyawo oluvannyuma era yategeezebwa nti yatwalibwa mu bizinga e Kalangala gy'akuumirwa wabula nga tatwalibwanga mu kkooti. "Baze oluvannyuma yateekebwa mu mawulire nga bagamba yakwatibwa ku misango okuli okumenya edduuka ssaako okubba mmotoka," Naluyange eyabadde akulukusa amaziga bwe yategeezezza.

Naluyange agamba ekisinga okumuluma nti ebbanga eryo lyonna lye bamusibye emisango gye baamussaako tewali wadde olunaku olumu lwe baali bamutadde mu kkooti okuvunaanibwa ekiraga nti baagala kumukuumira mu kkomera awatali musango gwonna.

Ayongerako nti omwami we y'eyali alabirira awaka mu buli kimu era okuva lwe yakwatibwa baagobwa mu nnyumba kubanga baali bapangisa ate nga n'abaana tebakyasoma kubanga ye yali abasasulira fi izi z'essomero.

Agamba obulamu ssi bwangu n'akatono okuva bba lwe yabulawo mu famire

OBUTAYAWUKANA na Naluyange, Galenda, omutuuze w'e Kireka naye emboozi y'okukwatibwa kwa bba Alex Ssekate Junior agirojja akaaba. Galenda agamba nti olunaku bba lwe yakwatibwa baali mu dduuka lyabwe eritunda amasimu ku kizimbe kya Kalungi Plaza.

Agamba nti omuserikale gwe yamanyaako nga ye Babonik owa poliisi ya CPS yajja ku ssaawa nga ttaano ez'emisana n'abasaba essimu zonna ze baali balina era n'atwala bba. " Nagenda ku CPS okulaba ensonga esibisizza omwami wange kyokka ne bangoba ku poliisi.

Oluvannyuma nagenda ewa afande Babonik era yang'amba nti y'alina bba wange kyokka n'okutuusa kati tayimbulwanga," Galenda bwe yanyumizza emboozi y'okukwatibwa kwa bba. Naye agamba nti n'okutuusa kati bba tatwalibwanga mu kkooti wadde okuddamu okumuwuliza ebimukwatako.

Aviation: Africa's passenger traffic 'expected to double over next 15 years'

The June 2023 Africa Focus Conference in Addis Ababa "will allow industry leaders to join forces and drive the Focus Africa initiative".

Aviation: Africa's passenger traffic 'expected to double over next 15 years'

Joseph Kizza

Senior Producer - Digital Content @New Vision