Katikkiro Mayiga asoomozzezza ab'ebyokwerinda ku ngeri gyebakuttemu ensonga za Kkanmpeyini

KATIKKIRO wa Buganda Charles Peter Mayiga asabye Poliisi n’ebitongole ebikuumaddembe okukwasisa amateeka n’ebiragiro mu ngeri etali ya lyaanyi erisukkiridde.

Mu kiseera kino ekya kampeyini z’okulondera eggwanga abakulembeze, Mayiga era asabye poliisi okulaba ng’etuukirizza obuvunanyizibwa buno, ebukole mu ngeri etalaga kyekuubira yenna mu by’obufuzi.

Okukozesa eryaanyi erisusse mu nkungaana z’omukulembeze wa National Unity Platform, Robert Kyagulanyi Sentamu, Poliisi okuyita mu mwogezi waayo, Kituuma Rusoke egamba nti ebeera egumbulula abantu obutakubira kampeyini mu nguudo.

Ku lwokusatu, Ssentebe w’akakiiko k’ebyokulonda mu ggwanga, Omulamuzi Simon Mugenyi Byabakama yasinzidde ku kitebe ky’akakiiko kano n’avumirira Bannabyabufuzi okuyisa ebivvulu mu nguudo kyeyagambye nti kibeera kitaataganya abantu abalala abakozesa enguudo zino bannabyabufuzi byebayisaamu kampeyini.

“ Twali tutandiika kampeyini, twasaba abeesimbyewo ku Bwapulezidenti okukuuma ebiragiro ebyakkanyizibwako; okuyisa ebivvulu ku nguudo, kikyaamu era tukivumirira. Kati poliisi bwegezaako okukwasisa amateeka, akanyolagano nekabeerawo,” Byabakama bweyayogedde ku lwokusatu.

Wabula mu bubaka bwayisizza ku mikutu gye egy’emitimbagano olwaleero, Mayiga yagambye nti tekikkirizika kuwera bannabyabufuzi n’abawagizi baabwe okuyisa ebivvulu ku nguudo nga bali mu kukuba kampeyini!

“Enkungaana z’ebyobufuzi tezibeera za kusaba wekyetaagisa abagoberezi okugenda nga beewombese era nga bakakkamu. Enkungaana z’ebyobufuzi yonna gyezibeera za massanyu na kubinuka,” Mayiga bwagambye.

Mayiga awadde eky’okulabirako ky’entambula ya Bodaboda gyayogeddeko nti tosobola kusuubira bantu okugikozesa bagende mu bifo awagenda okukubirwa kampeyini mu kasirise!

Engeri ennungamu ey’okukwatamu embeera eno, Mayiga awadde poliisi n’ebitongole ebirala ebikuumaddembe okufuba okulaba ng’abantu tebalumya bannaabwe mu kuyisa ebivvulu bino kyokka babaleke mu ssanyu lyaabwe.

“N’olwekyo Amasasi, ttiyagaasi, embwa! Bino bireetera eggwanga lyaffe erimanyiddwa ng’ekkula lya Afirika, okuyiwa omusaayi,”Mayiga bwawabudde.

Byabakama yakiggumizza nti okuyisa ebivvulu,tekyetaagisa n’awa amagezi abeesimbyewo okugendanga butereevu mu bifo awakubirwa kampeyini gyebabeera basanga abawagizi baabwe era babategeeze ebyo byebagenda okubakolera.

Ku lwokusatu, Kyagulanyi yayita ku mikutu gye egy’emitimbagano n’alaga obutali bwenkanya obubatuusibwako n’okwoleka ebifananyi by’abawagizi ba NRM n’ebibiina ebirala nga bayisa ebivvulu mu bibuga neyemulugunya nti bbo tebakubwamu ttiyagaasi!

Mu ngeri y’emu abawagizi ba NRM e Kanungu baagudde ku kabenje bwe baabadde bayisa ebivvulu mu kwaniriza Pulezidenti Yoweri Museveni eyabadde mu kitundu ekyo ng’anoonya akalulu akanaamuzza ku Bwapulezidenti ku lwokubiri.